Шеста сесија на обуки за заштита на личните податоци

Агенцијата за заштита на личните податоци со поддршка на ЕУ твининг проектот „Поддршка во спроведувањето на модернизираната правна рамка за заштита на личните податоци“, на 1 и 2 јуни 2022 година ја организираше шестата сесија на обуки за заштита на личните податоци на тема „Вовед во заштитата на личните податоци“ и „Методологија за хармонизација на секторската легислатива со Законот за заштита на личните податоци со практичен пример“.

Обуката беше наменета за вработените во министерствата, другите органи на државната управа и агенциите чиишто надлежности вклучуваат изработка и усвојување на закони и подзаконски акти што меѓу другото уредуваат собирање, обработка и чување на лични податоци.

Во Законот за заштита на личните податоци е уредено кои задолжителни одредби треба да ги содржат законите со кои се уредува собирањето, обработката и чувањето на личните податоци. Во февруари 2022 година, Агенцијата донесе Одлука за утврдување на Методологија за хармонизација на секторската легислатива („Службен весник на Република Северна Македонија“ бр. 38/22).

На првиот дел од обуката беа опфатени новините од ЗЗЛП и главните обврски за контролорите и обработувачите, додека фокусот на вториот дел од обуката беше ставен на Методологијата за хармонизација на секторската легислатива и нејзина практична примена и опфати три главни теми: процесот за проверка на постојните закони и утврдување на потребата за хармонизација со новиот ЗЗЛП; процесот на спроведување Проценка на влијанието на законите од аспект на заштитата на личните податоци, и процесот на претходни консултации со АЗЛП во случај на изработка на нови законски решенија.